जनमतले लिए समर्थन फिर्ता

• वैशाख २२, २०८३ | १९४ पटक पढिएको | सीमा संदेश

मधेश प्रदेश सरकार गतिहिन र आर्थिक अनियमिततामा लिप्त रहेको आरोप लागि रहेको बेला जनमत पार्टीले सरकारलाई दिएको समर्थन फिर्ता लिएको छ ।

दलका प्रमुख सचेतक चन्दन सिंहले जनाए अनुसार नौ जना साँसदको हस्ताक्षर सहित समर्थन फिर्ता लिएको पत्र सोमबार प्रदेश प्रमुख सुरेन्द्र लाभलाई बुझाइएको छ ।

जनमत पार्टीबाट महेश यादव अर्थमन्त्री र बसन्त कुशवाहा खेलकुद मन्त्री रहेका छन् । बबिता इश्र उपसभामुख छिन् । जनमत पार्टीमा सत्ता विवाद चुलिएको छ । यसअघि जनमत पार्टीकै मुख्यमन्त्री सतिश कुमार सिंहलाई दलका नेता महेश यादवको नेतृत्वमा जनमत पार्टीले समर्थन फिर्ता लिएको थियो ।

यसैगरी स्रोतका अनुसार जनता समाजवादी पार्टी नेपालले पनि साँसदहरुको हस्ताक्षर सोमबार गराइ सकिएको छ । सरकारलाई दिइएको समर्थन फिर्ता लिएको पत्र मंगलबार प्रदेश प्रमुखलाई बुझाइने स्रोतले जनाएको छ। जसपा नेपालले समर्थन फिर्ता लिए नेपाली काँग्रेस संसदीय दलका नेता कृष्ण यादव नेतृत्वको सरकार अल्पमतमा पर्नेछ । एमालेको समर्थनमा जसपा नेपाल र जनमतसहितको सरकार बनाउने तयारी छ ।