सिरहामा २० जनाले कोरोनालाई जिते

• जेठ २७, २०७७ | ८२३ पटक पढिएको | बैधनाथ कुमार यादब

सिरहा । सिरहामा २० जनाले कोरोनालाई जितेर डिस्चार्ज भई घर फर्केका छन ।

सिरहाको धनगढीमाई नगरपालिकास्थित महेन्द्र गेनाई मेमोरियल अस्पतालको आईसोलेसनमा उपचाररत २० जना कोरोना संक्रमितहरु मंगलबार उपचार पश्चात निको भएर डिस्चार्ज भएका छन् । आईसोलेसनमा उपचारत २६ जना मध्ये एकै दिन २० जना कोरोना संक्रमितहरु निको भएर डिस्चार्ज भएको जिल्ला अस्पताल सिरहा जिल्ला स्वास्थ्य कार्यालय प्रमुख कृष्णदेव यादबले जानकारी दिएकाछन् ।

कोरोना संक्रमण पुष्टी भएपछि सो अस्पतालको आईसोलेसनमा उपचार भईरहेका मध्ये सिरहाका सखुवानन्कारकट्टी गाउँपालिकाका ३० वर्षिय पुरुष १ जना, लहान नगरपालिकाका १९ देखि ४५ वर्ष उमेरका ८ जना, धनगढीमाई नगरपालिकाका ३४ देखि ३८ वर्षका तीन जना, बरियारपट्टी गाउँपालिकाका १८ देखि ४० वर्ष उमेरका ४ जना, लक्ष्मीपुर पतारी गाउँपालिकाका २० वर्ष पुरुष, नवराजपुर गाउँपालिकाका १८ वर्षिय पुरुष, औरही गाउँपालिकाका ३२ वर्षिय पुरुष, कल्याणपुर नगरपालिकाका २० वर्षिय पुरुष र सप्तरीको रुपनी गाउँपालिकाका ३५ वर्षिय पुरुषलाई डिस्चार्ज गरिएको छ ।

गत जेठ ३, ५, ६ र १२ गते स्वाब संकलन हुँदा उनीहरु कोरोना संक्रमित भेटिएका थिए । जेठ १२ मा संक्रमित भेटिएकाहरु लहान नगरपालिकाका ८ जनालाई १५ दिनमा, धनगढीमाई नगरपालिकाका दुई जनालाई १५ दिनमा र एक जनालाई ६ दिनमा डिस्चार्ज गरिएको छ ।

डिस्चार्ज हुनेलाई सिरहाका प्रमुख जिल्ला अधिकारी सरोज गुरागाई, स्वास्थ्यकर्मीको टोलीले फूल दिएर घर फर्केका छन ।  अस्पतालको आईसोलेसनमा रहेका ६ जनाको पनि स्वास्थ्य अवस्था समान्य रहेको र उहाँहरु पनि केही दिनभित्रै उपचार पश्चात घर फर्किने महेन्द्र गेनाई कोरोना अस्पतालका इन्चार्ज डा. सुभास मण्डलको भनाई छ ।