उमेदवारलाई चुनाव प्रचारका लागि महिना बढी !

• साउन २४, २०७९ | ४०४ पटक पढिएको | सीमा संदेश

काठमाडौं । प्रतिनिधिसभा तथा प्रदेशसभा निर्वाचनमा उमेदवारले आफ्नो प्रचार प्रसारका लागि डेढ महिनाको समय पाउने भएका छन् ।

निर्वाचन आयोगले सार्वजनिक गरेको कार्यतालिकाअनुसार मनोनयन असोज २३ गतेका लागि तोकिएको छ भने निर्वाचन मंसिर ४ गते हुँदैछ ।

निर्वाचन आयोगले यस कार्यतालिकामा केही हेरफेर हुन सक्ने जनाएको छ । 

निर्वाचन आयोगका अनुसार असोज २३ गते प्रत्यक्षतर्फको प्रतिनिधि सभा तथा प्रदेश सभा सदस्यको उमेदवारी दर्ताको समय तय भएको छ ।

सहायक प्रवक्ता सूर्यप्रसाद अर्यालले निर्वाचन आयोगले आन्तरिक प्रयोजनका लागि अहिले कार्यतालिका बनाएको उल्लेख गर्दै केही तलमाथि गरेर अन्तिम रुप दिइने जनाए ।

उनका अनुसार यो कार्यतालिकाले अन्तिम रुप पाएपछि सार्वजनिक गरिनेछ ।

प्रत्यक्षतर्फका उमेदवारको अन्तिम नामावली असोज २६ गते प्रकाशन हुनेछ । असोज २८ गतेदेखि मतपत्र छपाइ सुरु हुनेछ । 

असोज ११ गते मुख्य निर्वाचन अधिकृत तथा निर्वाचन अधिकृतको नियुक्ति हुने कार्यतालिका छ । असोज २१ गते मुख्य निर्वाचन अधिकृत तथा निर्वाचन अधिकृतको कार्यालय स्थापना हुनेछ । 

प्रत्यक्षतर्फ १६५ प्रतिनिधि सभा तथा ३३० प्रदेश सभा सदस्य पदका लागि ७७ जिल्लामा मुख्य निर्वाचन अधिकृतको कार्यालय र ८८ स्थानमा निर्वाचन अधिकृतको कार्यालय स्थापना हुने आयोग स्रोतले जनाएको छ ।  

असोज २८ गतेदेखि मंसिर १ गतेसम्म मतदान अधिकृत र सहायक मतदान अधिकृतको नियुक्ति, मतदाता शिक्षा, मतदान सामग्री ढुवानी, मतपत्र ढुवानी, मतदान अधिकृतलाई निर्वाचन सामग्री हस्तान्तरण, उमेदवार तथा राजनीतिक दलको प्रचारप्रसार अवधि तोकिएको छ । 

मंसिर १ गते राति १२ बजेदेखि प्रचारप्रसारमा रोक लगाइनेछ । मंसिर ४ गते बिहान ७ बजेदेखि ५ बजेसम्म मतदान हुनेछ । 

प्रत्यक्षतर्फ १६५ प्रतिनिधि सभा सदस्य तथा प्रदेश सभातर्फ ३३० जनप्रतिनिधि निर्वाचित हुनेछन् । समानुपातिकतर्फ ११० जना प्रतिनिधि सभा सदस्य तथा २२० जना प्रदेश सभा सदस्य निर्वाचित हुनेछन् ।