आपराधिक उपद्रव मुद्दाको आरोपमा साह पक्राउ

• भदौ २०, २०८१ | ६६६ पटक पढिएको | सीमा संदेश

सरकारी कागजपत्र च्यातेको तथा कार्यालयमा अशान्ति मच्याएको आरोपमा बुधबार सप्तरीमा प्रहरीले एक जनालाई पक्राउ गरेको छ ।

राजविराजस्थित नापी कार्यालय सप्तरीमा कर्मचारीहरुसंग दुव्र्यवहार गरी कागजपत्रसमेत च्यातेको आरोपमा सप्तरीको रुपनी गाउँपालिका– १ का ४० वर्षीय प्रमोद साह “राणा” लाई नियन्त्रणमा लिइएको प्रहरीले जनाएको छ । सो कार्यालयमा गएर कर्मचारीलाई दुव्र्यवहार गर्नुका साथै कार्यालयको क्षेत्रीय बुकसमेत च्यातेर फ्यालेको आरोपमा साहलाई नियन्त्रणमा लिइएको जिल्ला प्रहरी कार्यालय सप्तरीका प्रवक्तासमेत रहेका प्रहरी नायब उपरीक्षक ढुण्डिराज नेउपानेले बताए ।

उनीमाथि आपराधिक उपद्रव मुद्दा चलाइएको छ भने सप्तरी जिल्ला अदालतबाट ३ दिनको म्याद थप गरी आवश्यक अनुसन्धान भइरहेको जिल्ला प्रहरी कार्यालय सप्तरीले जनाएको छ । पक्राउ परेका साह मिटरब्याजी बिरुद्ध गठित संघर्ष समितिमा पनि छन् । उनले नापी कार्यालयमा कर्मचारीले सेवाग्राहीसंग घुस मागेको विषयमा प्रश्न उठाउँदा र भिडियो बनाउन खोज्दा अचानक प्रहरी आएर आफूलाई पक्राउ गरेको दाबी गरेका छन् ।