कार पोखरीमा डुब्यो, दुई बेपत्ता, एक बाँचे

• कार्तिक २०, २०८१ | ३११ पटक पढिएको | सीमा संदेश

महोत्तरी तर्फ आउँदै गरेको एक कार सर्लाहीको एक पोखरीका डुबेपछि दुई जना बेपत्ता भएको छ । 

सर्लाहीको बयलवासबाट महोत्तरीको गौशाला जाँदै गरेको लु२च ६७५८ नम्बरको कार अनियन्त्रित भई सर्लाहीकै ईश्वरपुर नगरपालिका वडा नम्बर २ मियाँखोरस्थित पोखरीमा आज बिहान डुबेको छ ।

कारमा गौशाला नगरपालिका वडा नम्बर १० का अन्दाजी ३८ वर्षीय सुरेश महतो र सोनवा गाउँपालिका वडा नम्बर ८ का ३७ वर्षीय रामाकान्त ठाकुर सवार रहेको जिल्ला प्रहरी कार्यालय सर्लाहीले जनाएको छ ।

कार्यालयका प्रवक्ता प्रहरी नायब उपरीक्षक दीपक श्रेष्ठका अनुसार कारमा सवार अर्का व्यक्ति महोत्तरीको गौशाला वडा नम्बर २ का अन्दाजी ३१ वर्षीय जनक यादव पौडिएर बाहिर निस्कन सफल भएका थिए । घटनालगत्तै खोजी तथा उद्धारका लागि पुगेको प्रहरी टोलीले बेपत्ता भएका दुई जनालाई फेला पार्न नसकेपछि बर्दिबासस्थित सशस्त्र प्रहरी बल नेपाल नम्बर २ छिन्नमस्ता बाहिनीबाट गोताखोर टोली बोलाएको प्रवक्ता प्रनाउ श्रेष्ठले जानकारी दिए ।

कार अनियन्त्रित भएर सडक छेउमा रहेको सरस्वती उच्च माध्यामिक विद्यालयको पोखरीमा गएर डुबेको स्थानीयको भनाइ छ । घटनाका विषयमा थप अनुसन्धान भइरहेको प्रहरीले जनाएको छ ।