विश्वकप फुटबल : ट्युनिसियाले पहिलो हाफमा स्वीडेन २-१ ले अगाडि

• असार १, २०८३ | १२६ पटक पढिएको | सीमा संदेश

चार पटकको विश्वकप विजेता जर्मनीले फिफा विश्वकप फुटबल प्रतियोगिता २०२६ मा सुखद सुरुआत गरेको छ। 

अमेरिकाको ह्युस्टनस्थित एनआरजी स्टेडियममा ६८ हजार २१ दर्शकबिच भएको समूह ‘इ’ को खेलमा जर्मनीले पहिलो पटक विश्वकप खेलिरहेको क्यारेबियन राष्ट्र कुरासाओलाई ७-१ को भारी गोलअन्तरले पराजित गरेको हो। सन् २०१४ को उपाधि विजेता जर्मनी अघिल्ला दुई विश्वकपमा समूह चरणबाटै बाहिरिएको हुनाले यस जितसँगै उसले समूहमा महत्त्वपूर्ण ३ अंक जोड्दै प्रतियोगितामा बलियो पुनरागमनको संकेत दिएको छ।

खेलको छैटौँ मिनेटमै फ्लोरियन विर्ट्जको पासमा फेलिक्स न्मेचाले गोल गर्दै जर्मनीलाई सुरुआती अग्रता दिलाएका थिए। तर, खेलको २१ औँ मिनेटमा कुरासाओका लिभानो कोमेनेन्सियाले बक्सको बिचबाट बायाँ खुट्टाले प्रहार गर्दै गोल गरे र खेललाई १-१ को बराबरीमा ल्याएर इतिहास रचे। यो गोलसँगै विश्वकपमा पहिलो पटक पुगेको सानो देश कुरासाओका समर्थकहरू खुसीले झुमेका थिए। खेलको २१ औँ मिनेटदेखि कुरासाओले जर्मनीलाई कडा टक्कर दिए पनि ३८ औँ मिनेटमा नाथानियेल ब्राउनको कर्नर किकमा निको स्लोटरबेकले हेडरमार्फत गोल गर्दै जर्मनीलाई पुनः २-१ को अग्रता दिलाए। पहिलो हाफको अतिरिक्त समयमा फेलिक्स न्मेचालाई बक्सभित्र लडाएपछि जर्मनीले पेनाल्टी पायो, जसमा काई हाभाट्र्जले गोल गर्दै पहिलो हाफमा टोलीलाई ३-१ को स्थितिमा पुर्‍याए।

दोस्रो हाफमा जर्मनीले खेललाई पूर्ण रूपमा आफ्नो नियन्त्रणमा लियो र थप चार गोल गर्‍यो। ४७ औँ मिनेटमा जमाल मुसिएलाले गोलकिपरको क्षेत्र पार गर्दै दायाँ खुट्टाको प्रहारबाट गोल गरे भने ६८ औँ मिनेटमा २२ वर्षीय नाथानियेल ब्राउनले गोल थप्दै जर्मनीको अग्रता ५-१ बनाए। ७८ औँ मिनेटमा डेनिज उन्डाभ र ८८ औँ मिनेटमा काई हाभाट्र्जले व्यक्तिगत दोस्रो गोल गरेपछि जर्मनी ७-१ को फराकिलो जित निकाल्न सफल भयो। यो खेलमा अन्तर्राष्ट्रिय सन्यास फिर्ता लिएर टोलीमा फर्किएका जर्मनीका ४० वर्षीय भेट्रान गोलकिपर म्यानुएल न्युअरले झन्डै दुई वर्षपछि मैदानमा उत्रिँदै एक उत्कृष्ट बचाउ समेत गरे।

यस खेलमा विश्वकप इतिहासकै सबैभन्दा धेरै उमेर अन्तर भएका दुई प्रशिक्षक आमनेसामने भएका थिए। कुरासाओका ७८ वर्षीय प्रशिक्षक डिक एड्भोकाट प्रतियोगिताकै सबैभन्दा जेठा प्रशिक्षक हुन् भने जर्मनीका ३८ वर्षीय प्रशिक्षक जुलियन नागेल्सम्यान सबैभन्दा कान्छा प्रशिक्षक हुन्। 

जितपछि प्रतिक्रिया दिँदै जर्मनीका प्रशिक्षक नागेल्सम्यानले भने, ‘हामीलाई यो विश्वासिलो जित र आत्मविश्वास साँच्चै चाहिएको थियो। यो खेलमा प्रवेश गर्नुअघिको तुलनामा अहिले हामी राम्रो स्थानमा छौँ र हामी सही बाटोमा छौँ तर अवश्य पनि त्यहाँ केही कुराहरू छन् जुन हामी अझ राम्रो गर्न सक्छौँ।’ 

अर्कोतर्फ कुरासाओकी समर्थक जेरल मार्गारीथाले भनिन्, ‘यद्यपि यो म थिइनँ, यो म जस्तै महसुस भयो, यो हामी सबै हौँ, सम्पूर्ण टापु, सबैजना हौँ। हामीले आफ्नो सारा तागत लगाएर हुटिङ गर्‍यौँ, त्यसैले हामी खुसी थियौँ।’ अब जर्मनीले आफ्नो अर्को खेल आगामी आइतबार टोरन्टोमा आइभरी कोस्टसँग खेल्नेछ भने कुरासाओले आइतबार नै कान्सास सिटीमा इक्वेडरको सामना गर्नेछ। एपी